پیرس ، 3/ اگست (ایس او نیوز /ایجنسی) پیرس اولمپک کے ساتویں دن تیراندازی میں دھیرج بومّا دیورا اور انکتا بھگت کی ناکامی کے بعد اب آٹھویں دن ہندوستانی دستے سے 4 تمغہ جیتنے کی امید کی جا رہی ہے۔ ہندوستان کو سب سے زیادہ امیدیں 2 کانسے کا تمغہ جیت چکی منو بھاکر سے ہے جو آج 25 میٹر ویمنس پسٹل کے فائنل میں مقابلے میں اتریں گی۔ امید کی جا رہی ہے کہ اس بار منو گولڈ پر نشانہ لگائیں گی۔ ان کا مقابلہ آج (3 اگست) دوپہر ایک بجے سے ہوگا۔

دوسری طرف ویمنس انڈیوجوئل تیراندازی میں بھجن کور اور دیپیکا کماری سے بھی کافی امیدیں ہیں۔ اگر یہ دونوں کھلاڑی کوالیفائی کر گئے تو سونے یا کانسے کے تمغہ پر نشانہ لگا سکتے ہیں۔ اسکیٹ شوٹنگ میں اننت جیت سنگھ نروکا بھی ہندوستان کی جھولی میں ایک تمغہ ڈال سکتے ہیں لیکن اس کے لیے اننت کو پہلے مینس اسکیٹ کے فائنل میں جگہ بنانی ہوگی۔ دن میں چوتھے تمغہ کی امید ایتھلیٹکس کے مینس شاٹ پٹ میں تجندر پال سنگھ تور سے ہے۔ تجندر کو بھی تمغہ جیتنے کے لیے پہلے فائنل راؤنڈ کے لیے کوالیفائی کرنا ہوگا۔ اگر ان کھلاڑیوں نے آج بہتر کارکردگی کا مظاہرہ کیا تو ہندوستان کی جھولی میں کئی تمغے آسکتے ہیں۔

پیرس اولمپک میں آج ہندوستان کا شیڈول:

شوٹنگ:

• ویمنس اسکیٹ کوالیفکیشن دن 1 – رائجا ڈھلوں، ماہیشوری چوہان – دوپہر 12.30 بجے
• مینس اسکیٹ کوالیفکیشن دن 2 – اننت جیت سنگھ نروکا – دوپہر 12.30 بجے
• ویمنس 25 میٹر پسٹل: فائنل – منو بھاکر – دوپہر 1.00 بجے
• مینس اسکیٹ فائنل (کوالیفکیشن کی بنیاد پر) – شام 7.00 بجے

گولف:

• مینس انڈیوجوئل اسٹروک پلے راؤنڈ 3 – شوبھنکر شرما اور گگنجیت بھُلّر – دوپہر 12.30 بجے

تیراندازی:

• ویمنس انڈیوجوئل راؤنڈ آف 16 – دیپیکا کماری بنام مشکیل کروپین (جرمنی) – دوپہر 1.52 بجے
• ویمنس انڈیوجوئل راؤنڈ آف 16 – بھجن کور بنام ڈائنندا چوئرونسا (INA) – دوپہر 2.05 بجے
• ویمنس انڈیوجوئل کوارٹر فائنل (کوالیفکیشن کی بنیاد پر) – شام 4.30 بجے
• ویمنس انڈیوجوئل سیمی فائنل (کوالیفکیشن کی بنیاد پر) – شام 5.22 بجے
• ویمنس انڈیوجوئل برانج میڈل میچ (کوالیفکیشن کی بنیاد پر) – شام 6.03 بجے
• ویمنس انڈیوجوئل گولڈ میڈل میچ (کوالیفکیشن کی بنیاد پر) – شام 6.16 بجے

سیلنگ:

• مینس ڈِنگی ریس 5 – وشنو سرونن – دوپہر 3.45 بجے
• مینس ڈِنگی ریس 6 – وشنو سرونن – ریس 5 کے بعد
• ویمنس ڈِنگی ریس 4 – نیترا کُمانن – دوپہر 3.35 بجے
• ویمنس ڈِنگی ریس 5 – نیترا کُمانن – ریس 4 کے بعد
• ویمنس ڈِنگی ریس 6 – نیترا کُمانن – ریس 5 کے بعد

باکسنگ:

• مینس 71 کیلوگرام کوارٹر فائنل – نشانت دیو بمقابلہ مارکو الونسو ورڈے الواریز – رات 12.18 بجے (4اگست)

پیرس اولمپک 2024: منو بھاکر نے تاریخ رقم کی اور ہاکی میں بھی ہندوستانی ٹیم کو ملی کامیابی

 پیرس اولمپک 2024 کا چوتھا دن ہندوستان کے لیے کئی معنوں میں اہم ثابت ہوا۔ سب سے بڑی بات یہ رہی کہ ہندوستانی خاتون شوٹر منو بھاکر نے آج مکسڈ مقابلے میں کانسہ کا تمغہ حاصل کر ایک ہی اولمپک میں دو تمغے حاصل کرنے والی پہلی ہندوستانی کھلاڑی بن گئی ہیں۔ اس تاریخی کارکردگی کے علاوہ بھی ہندوستان کو آج کچھ اہم خوشخبریاں ملیں۔ آئیے جانتے ہیں کہ آج ہندوستان کا دن پیرس اولمپک 2024 میں کسا رہا۔

منو بھاکر اور سربجوت کی جوڑی نے جیتا کانسے کا تمغہ:30 جولائی کو منو بھاکر اور سربجوت سنگھ نے ہندوستان کے لیے بہت خاص بنا دیا۔ 10 میٹر ایئر پسٹل مکسڈ ایونٹ میں اس جوڑی نے کانسہ کا تمغہ جیت لیا۔ اس جیت کے ساتھ ہی منو بھاکر نے تاریخ رقم کر دیا۔ وہ ایک ہی اولمپک میں دو تمغہ جیتنے والی ملک کی پہلی کھلاڑی بن گئیں۔ اس سے قبل پیرس اولمپک کے دوسرے دن انھوں نے 10 میٹر ایئر پسٹل سنگل ایونٹ میں بھی کانسے کا تمغہ جیتا تھا۔

ہندوستان اور آئرلینڈ کے درمیان ہاکی مقابلہ: ہندوستان اور آئرلینڈ کے درمیان ہوئے مقابلے میں  ہندوستانی ٹیم نے شاندار کارکردگی کا مظاہرہ کیا اور آئرلینڈ کو 0-2 سے شکست دی۔ کپتان ہرمن پریت سنگھ نے ہی دونوں گول داغے اور ہندوستانی ٹیم کو فتح سے ہمکنار کرنے میں اہم کردار نبھایا۔ شروعاتی دو کوارٹر میں ہی ہندوستان نے جیت کی دعویداری پیش کر دی تھی اور آخر کار آئرلینڈ کو بری طرح سے شکست ہاتھ لگی۔

بیڈمنٹن مینس ڈبلز کے گروپ اسٹیج مقابلے میں ساتوِک-چراغ کی جوڑی نے شاندار کھیل کا مظاہرہ کیا اور انڈونیشیا کے محمد ریان آردیانتو اور فجر الفیان کی جوڑی کو شکست دے دی۔ اس ہندوستانی جوڑی نے انڈونیشیائی جوڑی کو 13-21 اور 13-21 سے ہرایا۔ اس مقابلے میں ساتوک-چراغ کی جیت پختہ مانی جا رہی تھی، کیونکہ اسی انڈونیشیائی جوڑی کے خلاف پہلے ہوئے تین مقابلوں میں بھی اسی ہندوستانی جوڑی نے جیت درج کی تھی۔

تیر انداز بھجن کور کی شاندار کارکردگی: آرچری یعنی تیر اندازی کے مقابلے میں بھجن کور نے آج زبردست کھیل کا مظاہرہ کیا۔ پہلے کھیلے گئے راؤنڈ آف 64 میں وہ کامیاب رہیں اور اس کے بعد راؤنڈ آف 32 میں بھی جیت درج کی۔ اب ان کا راؤنڈ آف 16 یعنی پری-کوالیفائی مقابلہ 3 اگست کو کھیلا جائے گا جس میں ان سے کافی امیدیں ہیں۔

کچھ کھلاڑیوں نے ہندوستانی شیدائیوں کو کیا مایوس: باکسنگ میں 51 کلوگرام زمرہ کے مینس مقابلے میں امت پنگھال نے مایوس کیا۔ راؤنڈ آف 16 میں انھیں جامبیا کے پیٹرک چنیمبا سے شکست ہاتھ لگی۔ اس کے علاوہ بیڈمنٹن میں اشونی پونپّا اور تنیشا کریسٹو کی جوڑی بھی ہار گئی۔ انھیں آسٹریلیا کی مپاسا سیٹیانا اور یو انجیلا کی جوڑی نے 15-21، 10-21 سے شکست دی۔ تیر اندازی کے خاتون سنگلز مقابلے میں انکیتا کو بھی وایولیٹا مائجور کے ہاتھوں شکست کا سامنا کرنا پڑا۔ علاوہ ازیں ٹریپ شوٹنگ کے کوالیفکیشن ایونٹ میں پرتھوی راج بھی فائنل کے لیے کوالیفائی کرنے سے محروم رہ گئے۔

خاتون ٹریپ ایونٹ کوالیفکیشن مقابلے میں بھی ہندوستانی کھلاڑیوں کی مایوس کن کارکردگی رہی۔ ہندوستان کی شریئسی سنگھ جہاں 22ویں مقام پر رہیں، وہیں راجیشوری کماری کو 21واں مقام حاصل ہوا۔ حالانکہ مقابلے میں ابھی دو راؤنڈ مزید بچے ہوئے ہیں جو 31 جولائی کو ہوں گے۔ روئنگ کے مینس سنگلز اسکلس کے کوارٹر فائنل مقابلے میں بلراج پنوار کو پانچواں مقام حاصل ہوا۔ اس طرح وہ میڈل کی دوڑ سے باہر ہو گئے ہیں۔ اگر وہ ٹاپ-3 میں جگہ بناتے تو میڈل جیتنے کے انتہائی قریب پہنچ جاتے۔ مکہ بازی میں خاتون کے 57 کلوگرام راؤنڈ آف 32 مقابلے میں جیسمین لیمبوریا کو بھی شکست کا سامنا کرنا پڑا۔ جیسمین لیمبوریا فلپائن کی نیسٹی پیٹیسیو سے شکست کھا کر اولمپک سے باہر ہو گئیں۔